Abrikot hezurrarekin egindako txulubita aerofonoen familiako soinu-tresna da.

Egitura

Abrikot hezur bat hartu eta honen ertza harri baten kontra igurtziz higatzen da, hezurra zulatu arte. Gero, labana, guraize edo iltze puntarekin barruko hazia ateratzen da barrengoa garbi-garbi utzirik. Zulo aldea ere kontu handiz ondo egina utzi behar da, zuloaren ertza zorrotza bukaturik.

Joera

Txulubita bi hatzekin muturretatik hartu eta beheko ezpainen kontra jarririk, haizea indarrez, zuloaren ertzaren kontra bota eta txistu ozen eta agudoa lortzen da.

Historia

Juan Mari Beltranek bere haurtzaroan Nafarroako Larraun eta Sakanaldean jolasten zuen halako txulubitekin (Beltran, 1993, 77-78 orr.). Halako tresnak Euskal Herriko eskualde guztietan erabili izan dira eta batzuetan erabiltzen dira oraindik ere.

ITURRIAK

Bibliografia

BELTRAN ARGIÑENA, Juan Mari. (1996). Soinutresnak euskal herri musikan. Hernani: Orain.

ETNIKER. (1993). Juegos infantiles en Vasconia. Etniker Euskalerria. Gasteiz: Eusko Jaurlaritza. (694. or).

MUSEO Arqueológico, Etnográfico e Histórico Vasco / Euskal Arkeologia, Etnografia eta Kondaira Museoa (1998): Haur-jolasak eta jostailuak / Juegos y Juguetes del Museo Vasco de Bilbao. Euskal Museoa Bilbao Museo Vasco / Fundación Bilbao Bizkaia Kutxa (106. or.).